અમદાવાદના યુવકનો જ્યોર્જિયામાં અચાનક સંપર્ક તૂટ્યો
અમદાવાદના વિરાટનગર વિસ્તારમાં રહેતા ધ્વનિત રાજદીપ નામના યુવકનો જ્યોર્જિયામાંથી છેલ્લા 10 દિવસથી કોઈ સંપર્ક થયો નથી. ધ્વનિત જ્યોર્જિયાની કોકસસ ઇન્ટરનેશનલ યુનિવર્સિટીમાં MBBSનો અભ્યાસ કરી રહ્યો હતો. પરિવારજનોએ જણાવ્યું કે 14 મે બાદ તેનો ફોન સંપૂર્ણપણે સ્વીચઓફ થઈ ગયો હતો.
યુક્રેન યુદ્ધ બાદ જ્યોર્જિયામાં અભ્યાસ શરૂ કર્યો હતો
ધ્વનિત અગાઉ યુક્રેનમાં મેડિકલ અભ્યાસ કરતો હતો, પરંતુ રશિયા-યુક્રેન યુદ્ધના કારણે તેને અભ્યાસ અધવચ્ચે છોડીને ભારત પરત આવવું પડ્યું હતું. બાદમાં તેણે જ્યોર્જિયામાં પ્રવેશ લઈને અભ્યાસ ચાલુ રાખ્યો હતો અને હાલમાં નવમા સેમેસ્ટરમાં હતો.
ફ્લેટ માલિક પર ગંભીર આરોપો
પરિવારના જણાવ્યા મુજબ ધ્વનિત ટીબલીસી શહેરમાં ભાડાના ફ્લેટમાં રહેતો હતો. ફ્લેટ માલિક અનિલ, તેની ગર્લફ્રેન્ડ માન્યા અને તેમના સાથી ઝાકી દ્વારા સતત માનસિક ત્રાસ આપવામાં આવતો હતો. ધ્વનિતે અન્ય ફ્લેટમાં શિફ્ટ થવાનો નિર્ણય કર્યો હતો, પરંતુ ત્યારબાદ પણ તેને ધમકીઓ મળતી રહી હતી.
પૈસાની માંગણી અને જાનથી મારી નાખવાની ધમકી
પરિવારે આક્ષેપ કર્યો છે કે ફ્લેટ માલિકે ધ્વનિતનો સામાન રોકી રાખીને રૂપિયા માંગ્યા હતા. પૈસા નહીં આપે તો જાનથી મારી નાખવાની ધમકી આપવામાં આવી હતી. ધ્વનિતે પરિવારને ફોન કરીને સમગ્ર ઘટનાની જાણ કરી હતી. પરિવાર દ્વારા માંગેલા રૂપિયા મોકલ્યા બાદ પણ તેને હેરાન કરવામાં આવતો હોવાનું સામે આવ્યું છે.
અમદાવાદ પરત આવવા નીકળ્યો, પછી ફોન બંધ
પરિવારના જણાવ્યા અનુસાર ધ્વનિતને તરત જ ભારત પરત આવવા કહેવામાં આવ્યું હતું. 14 મેના રોજ તે એરપોર્ટ જવા નીકળ્યો હતો અને પાસપોર્ટ સાથે અમદાવાદ આવવાની તૈયારીમાં હતો. પરંતુ ત્યારબાદ અચાનક તેનો ફોન બંધ થઈ ગયો અને ત્યારથી કોઈ માહિતી મળી નથી.
પરિવારે એમ્બેસી અને પોલીસનો સંપર્ક કર્યો
ધ્વનિતનો સંપર્ક તૂટતા પરિવારજનોએ જ્યોર્જિયાની પોલીસ, ભારતીય એમ્બેસી અને યુનિવર્સિટીને જાણ કરી હતી. તેમ છતાં કોઈ ચોક્કસ માહિતી મળી નથી. પરિવારનો આક્ષેપ છે કે સ્થાનિક પોલીસ પૂરતો સહકાર આપી રહી નથી.
ધ્વનિતનો ભાઈ શોધખોળ માટે જ્યોર્જિયા પહોંચ્યો
પરિવારે ધ્વનિતના ભાઈને જ્યોર્જિયા મોકલ્યો છે જેથી સ્થળ પર જઈને શોધખોળ કરી શકાય. પરિવાર સતત સોશિયલ મીડિયા અને સ્થાનિક સ્તરે પણ માહિતી મેળવવાનો પ્રયાસ કરી રહ્યો છે.
માતાની સરકારને ભાવુક અપીલ
ધ્વનિતની માતા ધર્મિષ્ઠાબેને રડતા રડતા જણાવ્યું કે તેમનો દીકરો ખૂબ મહેનતુ અને હોશિયાર વિદ્યાર્થી છે. સપ્ટેમ્બર મહિનામાં ડોક્ટરની ડિગ્રી લઈને પરત આવવાનો હતો. તેમણે ગુજરાત સરકાર અને કેન્દ્ર સરકારને અપીલ કરી છે કે તેમના દીકરાને સુરક્ષિત રીતે પરત લાવવામાં મદદ કરે.
સાંસદે વિદેશ મંત્રાલયને લખ્યો પત્ર
અમદાવાદ પશ્ચિમના સાંસદ દિનેશ મકવાણાએ સમગ્ર મામલે વિદેશ મંત્રાલયનું ધ્યાન દોર્યું છે. તેમણે જણાવ્યું કે પરિવાર તરફથી રજૂઆત મળતા જ તાત્કાલિક મંત્રાલયને માહિતી મોકલવામાં આવી છે અને યુવકને સુરક્ષિત શોધી કાઢવા માટે પ્રયત્નો શરૂ કરાયા છે.
પરિવારમાં ભારે ચિંતા અને આક્રંદનો માહોલ
ધ્વનિતના અચાનક ગુમ થતાં સમગ્ર પરિવાર ચિંતામાં મુકાયો છે. છેલ્લા ઘણા દિવસોથી પરિવાર સતત દીકરાની રાહ જોઈ રહ્યો છે અને સરકાર તથા તપાસ એજન્સીઓ પાસે મદદની અપેક્ષા રાખી રહ્યો છે.
