રાત્રિના ખનીજ ચેકિંગ બાદ મહેસાણા શહેરમાં સર્જાયો હંગામો
મહેસાણા શહેરમાં ખનીજ વાહનોના ચેકિંગ દરમ્યાન ફરજ બજાવી પરત ફરી રહેલી ટીમ ઉપર હુમલો અને ધમકીની ગંભીર ઘટના સામે આવતા કાયદો-વ્યવસ્થાને લઈને અનેક સવાલો ઉભા થયા છે. સરકારી કામગીરી દરમિયાન બોલાચાલી, મારામારી અને જાનથી મારી નાખવાની ધમકી આપવાના આક્ષેપ સાથે મહેસાણા શહેર એ-ડિવિઝન પોલીસ મથકે ગુનો નોંધાતા મામલો ભારે ચર્ચાનો વિષય બન્યો છે.
ઉંઝામાં ખનીજ વાહનોનું ચેકિંગ કરી પરત ફરી રહી હતી ટીમ
ફરિયાદ મુજબ, મહેસાણા ખાતે રહેતા અને મૂળ કચ્છ જિલ્લાના દેવપર ગામના રહેવાસી દીલીપભાઈ લખુભાઈ દેવાભાઈ રબારી તથા તેમની સાથેના અધિકારીઓ ગત ૨૧ મેની મધરાતે ઉંઝા વિસ્તારમાં ખનીજ વાહનોનું ચેકિંગ કરવા માટે ગયા હતા. ટીમે ચાર ડમ્પરોને અટકાવી તપાસ હાથ ધરી હતી. જેમાંથી ત્રણ ડમ્પરો સામે દંડાત્મક કાર્યવાહી કરવામાં આવી હતી જ્યારે એક ડમ્પર કાયદેસર દસ્તાવેજો ધરાવતું હોવાને કારણે મુક્ત કરવામાં આવ્યું હતું.
ચેકિંગ પૂર્ણ કર્યા બાદ ટીમ વહેલી સવારે આશરે ૩:૩૦ વાગ્યે મહેસાણા શહેરના વિસનગર રોડ પર આવેલા રીયા હોન્ડા શોરૂમ અને વન ટેન હોટલ નજીક પહોંચી હતી.
બલેનો કારમાં આવેલા શખ્સોએ કર્યો બખેડો
આ દરમિયાન બ્લ્યુ કલરની બલેનો કારમાં આવેલા બે શખ્સોએ ટીમ સાથે ઉગ્ર બોલાચાલી શરૂ કરી હોવાનું ફરિયાદમાં ઉલ્લેખાયું છે. આરોપીઓમાં ગોવિંદ રૂપાજી ઠાકોર રહે-સાંપ્રા તાલુકો સરસ્વતી, જિલ્લો પાટણ અને અન્ય એક “સગલા” નામનો શખ્સ સામેલ હોવાનું જણાવાયું છે.
ફરિયાદ અનુસાર, “સગલા” નામના શખ્સે ટીમ સાથે અપશબ્દો બોલી ઉશ્કેરાટભર્યો માહોલ ઉભો કર્યો હતો. બાદમાં ગોવિંદ ઠાકોર કારમાંથી ધોકો લઈ આવ્યો અને ટીમના સાહેદ વિકાસ જુડાળ સાથે મારામારી કરી હતી.
“ઘરે આવી જાનથી મારી નાખીશું” : ખુલ્લી ધમકીનો આક્ષેપ
ઘટના દરમિયાન આરોપીઓએ સરકારી કર્મચારીઓને ધમકાવતા કહ્યું હતું કે, “તને જોઈ લઈશું, તારા ઘરે આવી જાનથી મારી નાખીશું.” એટલું જ નહીં, “તું સરકારી સાહેબ હોય તો તારા ઘરનો” તેમજ “તમારે જે થાય એ કરી લેજો, FIR કરવી હોય તો કરી લેજો” જેવા ઉશ્કેરણીજનક શબ્દો પણ ઉચ્ચાર્યા હોવાનો ફરિયાદમાં ઉલ્લેખ છે.
સ્થળ ઉપર વધુ લોકોને બોલાવવાની ધમકી આપવામાં આવતા થોડા સમય માટે તણાવપૂર્ણ માહોલ સર્જાયો હતો. ત્યારબાદ બંને શખ્સો બ્લ્યુ બલેનો કારમાં બેસી સ્થળ પરથી ફરાર થઈ ગયા હતા.
સરકારી ફરજમાં રૂકાવટ અને હથિયારબંધી જાહેરનામાના ભંગનો ગુનો
સમગ્ર ઘટનાને લઈને મહેસાણા શહેર એ-ડિવિઝન પોલીસ દ્વારા સરકારી ફરજમાં રૂકાવટ, મારામારી, ધમકી તથા જિલ્લા મેજિસ્ટ્રેટના હથિયારબંધી જાહેરનામાના ભંગ સહિતની વિવિધ કલમો હેઠળ ગુનો નોંધવામાં આવ્યો છે.
પોલીસે આરોપીઓની શોધખોળ હાથ ધરી હોવાનું જાણવા મળ્યું છે. સરકારી કામગીરી દરમિયાન અધિકારીઓ પર હુમલા જેવી ઘટનાઓ સામે આવતા ખનીજ માફિયા અને અસામાજિક તત્વોના બેફામ વલણ સામે ફરી એકવાર સવાલો ઊભા થયા છે.
