અમદાવાદમાં વોર્ડવાઈઝ વરસાદની આગાહી હવે શક્ય
ચોમાસા દરમિયાન વરસાદની ચોક્કસ આગાહી માટે અમદાવાદ મ્યુનિસિપલ કોર્પોરેશન (AMC) દ્વારા અદ્યતન રેઇન ફોલ વેધર ફોરકાસ્ટિંગ સિસ્ટમ અમલમાં મૂકવામાં આવી છે. વેબ આધારિત ઈન્ટિગ્રેટેડ મોડેલિંગ અને ડિસિઝન સપોર્ટ સિસ્ટમની મદદથી હવે શહેરના દરેક વોર્ડ માટે અલગથી વરસાદનું અનુમાન મેળવી શકાય છે.
આજે સાંજે 7થી 9 વાગ્યા વચ્ચે ભારે વરસાદની સંભાવના
મહારાષ્ટ્રના પુણે સ્થિત C-DAC દ્વારા તૈયાર કરાયેલા મોડલ મુજબ આજે સાંજે 7 વાગ્યા બાદ અમદાવાદમાં ભારે વરસાદની શક્યતા છે. ખાસ કરીને રાત્રે 9 વાગ્યાની આસપાસ શહેરના પશ્ચિમ વિસ્તારમાં સૌથી વધુ વરસાદ થવાની આગાહી કરવામાં આવી છે.
આ વિસ્તારોમાં સૌથી વધુ વરસાદની શક્યતા
સાંજે 7થી 9 વાગ્યા દરમિયાન નીચેના વિસ્તારોમાં ભારે વરસાદ પડી શકે છે:
-
થલતેજ
-
બોડકદેવ
-
જોધપુર
-
વેજલપુર
-
સરખેજ
-
બોપલ
-
ગોતા
-
લાંભા
-
ચાંદખેડા
-
રાણીપ
-
પાલડી
-
આશ્રમ રોડ
-
એસ.જી. હાઈવે આસપાસનો વિસ્તાર
થલતેજ અને જોધપુરમાં 60થી 80 મીમી વરસાદનો અંદાજ
AMCના ઈન્ચાર્જ સિટી ઈજનેર ઋષિ પંડ્યાના જણાવ્યા મુજબ આજે સાંજે મુખ્યત્વે થલતેજ, જોધપુર અને બોડકદેવ વિસ્તારમાં 60થી 80 મીમી (બે ઈંચથી વધુ) વરસાદ પડી શકે છે. બપોર બાદ હળવો વરસાદ શરૂ થઈને સાંજે તેની તીવ્રતા વધવાની શક્યતા દર્શાવવામાં આવી છે.
નવી સિસ્ટમ કેવી રીતે કામ કરે છે?
આ સિસ્ટમમાં પુણેની C-DAC દ્વારા હાઈ પરફોર્મન્સ કમ્પ્યુટિંગ (HPC) આધારિત ડેટાનો ઉપયોગ કરવામાં આવે છે. WRF મોડલ (1.5 કિમી રિઝોલ્યુશન) દ્વારા વરસાદની તીવ્રતા, વિસ્તારવાર વિતરણ અને સંભવિત સ્થિતિનું વિશ્લેષણ કરવામાં આવે છે. વોર્ડ લેવલ પર અલગ-અલગ રંગો દ્વારા વરસાદની તીવ્રતા દર્શાવવામાં આવે છે, જેના આધારે તંત્ર અગાઉથી આયોજન કરી શકે છે.
મોનસૂન મેનેજમેન્ટમાં મળશે મદદ
AMCના જણાવ્યા મુજબ આ ટેક્નોલોજીથી પાણી ભરાવાની સંભાવના ધરાવતા વિસ્તારોમાં અગાઉથી મેનપાવર અને મશીનરી તૈનાત કરી શકાશે. તંત્રનો દાવો છે કે તાજેતરના વરસાદમાં આ સિસ્ટમની આગાહી આશરે 80 ટકા સુધી સચોટ રહી હતી, જેના આધારે હવે મોન્સૂન દરમિયાન વધુ અસરકારક આયોજન શક્ય બનશે.
