મહેસાણા જિલ્લામાં ઉત્તર ગુજરાતના જીરા વેપાર ક્ષેત્રમાં સેન્ટ્રલ સ્તરે મોટી કાર્યવાહી હાથ ધરાઈ છે. Central GST Intelligence (નવી દિલ્હી હેડક્વાર્ટર)ના માર્ગદર્શન હેઠળ કડી, કલોલ, ઊંઝા અને સિદ્ધપુર વિસ્તારમાં 15 જેટલા જીરાના વેપારીઓ તેમજ સંકળાયેલા ટ્રાન્સપોર્ટરો પર સામુહિક દરોડા પાડવામાં આવ્યા. સમગ્ર ઓપરેશનનું સંચાલન સીધું નવી દિલ્હીથી કરવામાં આવ્યું હોવાનું સૂત્રો જણાવી રહ્યા છે.
શું બહાર આવ્યું?
પ્રાથમિક તપાસમાં અંદાજે રૂ. 3 કરોડની કરચોરી પકડાઈ હોવાનું જાણવા મળ્યું છે. સાથે જ કરોડોની ટેક્સ ચોરી સંબંધી મહત્વના દસ્તાવેજો, હિસાબી પુસ્તકો, બિલ-વાઉચર અને ડિજિટલ રેકોર્ડ જપ્ત કરવામાં આવ્યા છે.તપાસમાં ખુલ્યું કે કેટલાક વેપારીઓ તૈયાર જીરુ ખરીદી તેને પેકિંગ કરી ફરી વેચાણ કરતા હતા, પરંતુ વેચાણ અને ખરીદીના હિસાબોમાં ગોટાળા હતા. ઇનપુટ અને આઉટપુટ ટેક્સ વચ્ચે તફાવત જોવા મળતા શંકા ઊભી થઈ હતી.
ટ્રાન્સપોર્ટરો પણ રડારમાં
માત્ર વેપારીઓ જ નહીં, પરંતુ માલ પરિવહન કરતા ટ્રાન્સપોર્ટરોના રેકોર્ડ પણ ચકાસવામાં આવ્યા. માલની હેરાફેરી, બિલ વિના માલસામાનની હિલચાલ અને રેકોર્ડમાં તફાવત જેવા મુદ્દાઓ સામે આવતા ટેક્સ ચોરીનો ભાંડાફોડ થયો.માલની હિલચાલ અને બિલિંગ ડેટાને ક્રોસ-ચેક કરતા કરચોરીની પદ્ધતિ બહાર આવી હોવાનું અધિકારીઓએ જણાવ્યું.
એક મહિનાથી ચાલી રહી હતી ગુપ્ત તપાસ
સૂત્રો મુજબ છેલ્લા એક મહિનાથી ગુપ્ત રીતે સમગ્ર નેટવર્ક પર નજર રાખવામાં આવી રહી હતી. ટેક્નિકલ સર્વેલન્સ, ડેટા એનાલિસિસ અને ફિલ્ડ ઇનપુટના આધારે આ સંકલિત દરોડાની કાર્યવાહી હાથ ધરાઈ.તપાસ દરમિયાન આંતરિક સ્તરે ભ્રષ્ટાચારની ગંધ આવતાં ઉચ્ચ કક્ષાએથી સેન્ટ્રલ GST ના એક સુપ્રિટેન્ડેન્ટ અને બે ઇન્સ્પેક્ટરોની બદલી કરવામાં આવી હોવાનું જાણવા મળ્યું છે. આ બદલીઓ પછી તપાસ વધુ ગતિશીલ બની.
વિસ્તાર મુજબ કાર્યવાહી
કડી,કલોલ,ઊંઝા,સિદ્ધપુર
ખાસ કરીને ઊંઝા વિસ્તાર જીરાના વેપાર માટે રાષ્ટ્રીય સ્તરે ઓળખાય છે, તેથી અહીંની કાર્યવાહી વ્યાપારી વર્તુળોમાં ચર્ચાનો વિષય બની છે.
વેપાર જગતમાં ચકચાર
આ સામુહિક દરોડા બાદ જીરા બજારમાં ચકચાર મચી ગઈ છે. અનેક વેપારીઓ પોતાના હિસાબી દસ્તાવેજો ચકાસવામાં વ્યસ્ત થયા છે. આવનારા દિવસોમાં વધુ ખુલાસા થવાની શક્યતા સૂત્રો વ્યક્ત કરી રહ્યા છે.
સેન્ટ્રલ GST ઇન્ટેલિજન્સની આ કાર્યવાહી ઉત્તર ગુજરાતના કૃષિ આધારિત વેપાર ક્ષેત્ર માટે એક મોટો સંદેશ માનવામાં આવી રહી છે કે ટેક્સ ચોરી સામે કડક પગલાં લેવામાં આવશે.
