મહેસાણા જિલ્લાના કડી તાલુકાના અલદેસણ રોડ ઉપર સીમ વિસ્તારમાં ગૌવંશ કતલનો બનાવ સામે આવતા શહેરમાં ખળભળાટ મચી ગયો હતો. ઘટનાની જાણ થતાં જ ધાર્મિક અને સામાજિક રીતે સંવેદનશીલ બનેલા આ મામલે તાત્કાલિક કડક કાર્યવાહી કરવાની માંગ ઉઠી હતી.
પરંતુ પરિસ્થિતિ વધુ બગડે તે પહેલાં જ કડી પોલીસ સ્ટેશનના PI ઓ.પી. સિસોદિયાએ કમાન સંભાળી અને તપાસને યુદ્ધસ્તરે આગળ ધપાવી.
સ્થળ પરથી ચોંકાવનારા પુરાવા
ગૌરક્ષકોની બાતમીના આધારે સીમ વિસ્તારમાં તપાસ કરતાં બે ગૌવંશના કતલ કરાયેલા અવશેષો મળી આવ્યા હતા. સ્થળ પરથી કતલ કરવા ઉપયોગમાં લેવાયેલા સાધનો તેમજ એક રીક્ષા પણ જપ્ત કરવામાં આવી.
આ બનાવ માત્ર કાયદો અને વ્યવસ્થાનો પ્રશ્ન નહોતો, પરંતુ શહેરમાં તણાવ ફેલાય તેવી શક્યતા ધરાવતો સંવેદનશીલ મુદ્દો હતો.
PI સિસોદિયાની કડક કમાન
મામલાની ગંભીરતા સમજી PI ઓ.પી. સિસોદિયાએ ટીમોને અલગ-અલગ દિશામાં મૂકી ટેકનિકલ સર્વેલન્સ, સીસીટીવી ફૂટેજ, મોબાઈલ લોકેશન અને બાતમીદારોના નેટવર્કના આધારે ઝડપી તપાસ હાથ ધરી.
કલાકોમાં જ આરોપીઓ સુધી પહોંચવામાં કડી પોલીસને સફળતા મળી. અમદાવાદના રહેવાસી ચાર શખ્સોને પોલીસે ઝડપી પાડ્યા અને કાયદેસરની કાર્યવાહી શરૂ કરી.
“ઝીરો ટોલરન્સ”નો સંદેશ
આ સમગ્ર ઓપરેશનમાં કડી પોલીસની ઝડપ અને સુચિત કામગીરી ચર્ચાનો વિષય બની છે. PI સિસોદિયાના માર્ગદર્શન હેઠળ ટીમે સ્પષ્ટ સંદેશ આપ્યો છે કે ગૌવંશ હત્યા જેવા ગુનાઓ પ્રત્યે કોઈ સહનશીલતા નહીં રાખવામાં આવે.
ગણતરીના કલાકોમાં ગુનાનો ભેદ ઉકેલી આરોપીઓને કબજામાં લેવા પોલીસની કામગીરીને સ્થાનિક સ્તરે સરાહના મળી રહી છે.
શહેરમાં શાંતિ જાળવવા અપીલ
ઘટના બાદ કાયદો અને વ્યવસ્થા જળવાઈ રહે તે માટે પોલીસ બંદોબસ્ત ગોઠવાયો છે. સ્થાનિકોને અફવાઓથી દૂર રહી શાંતિ જાળવવા અપીલ કરવામાં આવી છે.
કડી PI ઓ.પી. સિસોદિયાની ઝડપી અને દમદાર કાર્યવાહીથી સંવેદનશીલ મામલો વધુ વિકરાળ બનતા અટક્યો હોવાનું માનવામાં આવી રહ્યું છે.
