દિલ્હીમાં જીમ પર ફાયરિંગથી ખળભળાટ
દિલ્હીના પશ્ચિમ વિહાર વિસ્તારમાં આવેલા એક જીમ પર વહેલી સવારે અજાણ્યા હુમલાખોરોએ અંધાધૂંધ ગોળીબાર કર્યો હોવાની ઘટના સામે આવી છે. મોટરસાયકલ પર આવેલા બે શખ્સોએ જીમની બહાર અનેક રાઉન્ડ ફાયરિંગ કરીને સ્થળ પરથી ફરાર થઈ ગયા હતા. ઘટનામાં કોઈ જાનહાનિ થઈ નથી, પરંતુ ફાયરિંગ બાદ સમગ્ર વિસ્તારમાં ચકચાર મચી ગઈ છે.
કેરટેકરને મળી ઘટનાની જાણ
ઘટનાની જાણ સવારે ત્યારે થઈ જ્યારે જીમનો કેરટેકર સ્થળ પર પહોંચ્યો હતો. જીમના કાચ તૂટેલા અને ગોળીના નિશાન જોવા મળતા તેણે તરત જ પોલીસને જાણ કરી હતી. માહિતી મળતા જ દિલ્હી પોલીસના અધિકારીઓ અને ફોરેન્સિક ટીમ ઘટનાસ્થળે પહોંચી હતી. ફોરેન્સિક નિષ્ણાતોએ સ્થળ પરથી ખાલી કારતૂસ સહિતના પુરાવા એકત્ર કરીને તપાસ શરૂ કરી છે.
ગુરુ રંધાવા સાથે જોડાયેલું છે જીમ
તપાસ દરમિયાન સામે આવ્યું છે કે હુમલો થયેલું ફિટનેસ સેન્ટર પંજાબી ગાયક ગુરુ રંધાવા સાથે સંકળાયેલું છે. ગુરુ રંધાવા આ ફિટનેસ બ્રાન્ડના બ્રાન્ડ એમ્બેસેડર હોવાનું તેમજ બ્રાન્ડના પ્રચાર સાથે જોડાયેલા હોવાનું જાણવા મળ્યું છે. આ કારણસર ઘટનાને વધુ ગંભીરતાથી લેવામાં આવી રહી છે.
લોરેન્સ ગેંગના નામે પોસ્ટ વાયરલ
ફાયરિંગ બાદ સોશિયલ મીડિયા પર એક પોસ્ટ વાયરલ થઈ હતી, જેમાં લોરેન્સ બિશ્નોઈ ગેંગે હુમલાની જવાબદારી લીધાનો દાવો કર્યો છે. પોસ્ટમાં જણાવાયું છે કે ગુરુ રંધાવાને અગાઉ સલમાન ખાનથી દૂર રહેવા માટે સમજાવવામાં આવ્યા હતા, પરંતુ તેઓ સલમાન સાથે વધુ નજીક બની રહ્યા હતા. પોસ્ટમાં ગેંગના કેટલાક સભ્યોના નામોનો પણ ઉલ્લેખ કરવામાં આવ્યો છે.
પોસ્ટની સત્તાવાર પુષ્ટિ નથી
જોકે, વાયરલ થઈ રહેલી પોસ્ટની સત્તાવાર રીતે કોઈ પુષ્ટિ થઈ નથી. દિલ્હી પોલીસે સ્પષ્ટ કર્યું છે કે પોસ્ટની સત્યતા અને તેના સ્ત્રોત અંગે પણ તપાસ ચાલી રહી છે. પોલીસનું કહેવું છે કે હાલ કોઈ અંતિમ નિષ્કર્ષ પર પહોંચવું વહેલું ગણાશે.
CCTV અને ટેક્નિકલ પુરાવાના આધારે તપાસ
પોલીસે જીમની આસપાસના CCTV ફૂટેજ કબજે કર્યા છે અને હુમલાખોરોની ઓળખ માટે અલગ-અલગ ટીમોને કામે લગાડી છે. ખંડણી, ગેંગવોર, અંગત અદાવત સહિતના તમામ સંભવિત એંગલથી તપાસ હાથ ધરવામાં આવી રહી છે. પોલીસના જણાવ્યા અનુસાર હુમલાખોરોને ઝડપવા માટે વિવિધ સ્થળોએ દરોડાની કાર્યવાહી પણ શરૂ કરવામાં આવી છે.
ફિટનેસ ક્ષેત્રમાં સક્રિય છે ગુરુ રંધાવા
ગુરુ રંધાવા લાંબા સમયથી ફિટનેસ અને હેલ્ધી લાઇફસ્ટાઇલને પ્રોત્સાહન આપતા અભિયાનો સાથે જોડાયેલા છે. તેઓ અનેક ફિટનેસ બ્રાન્ડના ચહેરા તરીકે જાણીતા છે. તેમના નામ સાથે જોડાયેલા જીમ પર થયેલા હુમલાને કારણે આ ઘટનાએ દેશભરમાં ચર્ચા જગાવી છે.
