પ્રિ-મોન્સૂન વચ્ચે રાજ્યનું વાતાવરણ સૂકું, ભાવનગર સૌથી ગરમ
ગુજરાતમાં છેલ્લા 24 કલાક દરમિયાન પ્રિ-મોન્સૂન ગતિવિધિઓ વચ્ચે પણ વાતાવરણ મોટાભાગે સૂકું રહ્યું છે. મહત્તમ તાપમાનમાં કોઈ નોંધપાત્ર ફેરફાર જોવા મળ્યો નથી. સમગ્ર રાજ્યમાં સતત બીજા દિવસે સૌથી વધુ તાપમાન ભાવનગરમાં 41.4 ડિગ્રી સેલ્સિયસ નોંધાયું છે. રાજ્યના સરેરાશ તાપમાનમાં આશરે 1.3 ડિગ્રી સેલ્સિયસનો ઘટાડો નોંધાયો હોવા છતાં ગરમીનો પ્રકોપ યથાવત્ રહ્યો છે.
ગુજરાત તરફ ચોમાસાની ગતિ માટે અનુકૂળ સ્થિતિ
હવામાન વિભાગના જણાવ્યા અનુસાર નૈઋત્યનું ચોમાસું હાલમાં મહારાષ્ટ્ર, કર્ણાટક અને તેલંગાણાના વધુ વિસ્તારોમાં આગળ વધી રહ્યું છે. આગામી દિવસોમાં ચોમાસાની ગતિ વધુ મજબૂત બનવાની શક્યતા છે. જોકે ગુજરાતમાં આગામી એક સપ્તાહ દરમિયાન તાપમાનમાં કોઈ મોટો ફેરફાર થવાની શક્યતા નથી. રાહતની વાત એ છે કે દક્ષિણ ગુજરાત અને ત્યારબાદ સૌરાષ્ટ્રના કેટલાક વિસ્તારોમાં હળવોથી મધ્યમ વરસાદના સંકેતો મળી રહ્યા છે.
અમદાવાદમાં વાદળછાયું વાતાવરણ, ગરમીનો અહેસાસ યથાવત્
અમદાવાદમાં આગામી દિવસોમાં આંશિક વાદળછાયું વાતાવરણ રહેવાની શક્યતા છે. શહેરમાં મહત્તમ તાપમાન 41 ડિગ્રી સેલ્સિયસની આસપાસ રહી શકે છે. જેના કારણે બપોરના સમયે ગરમી અને ઉકળાટનો અનુભવ થશે. રવિવારે અમદાવાદમાં મહત્તમ તાપમાન 40.6 ડિગ્રી સેલ્સિયસ નોંધાયું હતું, જે સામાન્ય કરતાં 0.9 ડિગ્રી વધુ હતું. જ્યારે લઘુત્તમ તાપમાન 29 ડિગ્રી સેલ્સિયસ રહ્યું હતું.
માછીમારો માટે હાલ કોઈ વેધર વોર્નિંગ નહીં
હાલમાં હવામાન વિભાગે દરિયાકાંઠાના વિસ્તારો અથવા માછીમારો માટે આગામી 7 દિવસ દરમિયાન કોઈ વિશેષ વેધર વોર્નિંગ જાહેર કરી નથી. તેમ છતાં દક્ષિણ ગુજરાત અને સૌરાષ્ટ્રના કેટલાક ભાગોમાં પ્રિ-મોન્સૂન ગતિવિધિઓ વેગ પકડે તેવા સંકેતો મળી રહ્યા છે.
દક્ષિણ ગુજરાતમાં વરસાદી ઝાપટાંની શક્યતા
15 જૂનથી 17 જૂન દરમિયાન સુરત, ડાંગ, તાપી, નવસારી, વલસાડ, દમણ અને દાદરા નગર હવેલી સહિતના વિસ્તારોમાં છૂટાછવાયા સ્થળોએ હળવોથી મધ્યમ વરસાદ અથવા ગાજવીજ સાથે ઝાપટાં પડી શકે છે. આ સમયગાળા દરમિયાન ઉત્તર ગુજરાત, સૌરાષ્ટ્ર અને કચ્છના મોટાભાગના વિસ્તારોમાં હવામાન સૂકું રહેવાની શક્યતા છે.
સૌરાષ્ટ્રના દરિયાકાંઠે વરસાદની એન્ટ્રી
18 અને 19 જૂન દરમિયાન વરસાદનો વ્યાપ વધવાની શક્યતા છે. દક્ષિણ ગુજરાત ઉપરાંત છોટાઉદેપુર અને નર્મદા જિલ્લામાં પણ વરસાદી ગતિવિધિઓ જોવા મળી શકે છે. સાથે જ સૌરાષ્ટ્રના અમરેલી, ભાવનગર, ગીર સોમનાથ અને દીવ સહિતના દરિયાકાંઠાના વિસ્તારોમાં હળવોથી મધ્યમ વરસાદ પડી શકે છે.
દક્ષિણ ગુજરાત અને સૌરાષ્ટ્રમાં વરસાદ ચાલુ રહેશે
19 જૂનથી 21 જૂન દરમિયાન સુરત, ડાંગ, તાપી, નવસારી અને વલસાડ સહિતના દક્ષિણ ગુજરાતના વિસ્તારોમાં વરસાદી માહોલ યથાવત્ રહેવાની શક્યતા છે. સૌરાષ્ટ્રના અમરેલી, ભાવનગર, ગીર સોમનાથ અને દીવ જિલ્લામાં પણ હળવો વરસાદ ચાલુ રહી શકે છે. જ્યારે ઉત્તર ગુજરાત અને કચ્છ પ્રદેશમાં હવામાન મુખ્યત્વે સૂકું રહેવાની આગાહી કરવામાં આવી છે.
30 જિલ્લાઓમાં વાવાઝોડા અને વરસાદની શક્યતા
મોનસૂન હાલમાં દેશના 19 રાજ્યો સુધી પહોંચી ચૂક્યું છે અને આગામી 48થી 72 કલાકમાં મધ્યપ્રદેશમાં પ્રવેશવાની શક્યતા છે. ગુજરાતના લગભગ 30 જિલ્લાઓમાં ગાજવીજ, પવન અને વરસાદની સંભાવના વ્યક્ત કરવામાં આવી છે.
