રાજ્યભરમાં શાંતિપૂર્ણ માહોલમાં પૂર્ણ થઈ LRD લેખિત પરીક્ષા
ગુજરાત પોલીસ ભરતી બોર્ડ દ્વારા લોકરક્ષક કેડરની 12,733 જગ્યાઓ માટે આજે રાજ્યભરમાં લેખિત પરીક્ષા યોજાઈ હતી. શારીરિક કસોટીમાં સફળ થયેલા કુલ 2,63,345 ઉમેદવારો આ પરીક્ષા માટે પાત્ર બન્યા હતા. અમદાવાદ, સુરત, વડોદરા, રાજકોટ સહિત રાજ્યના વિવિધ શહેરોમાં આવેલી 849 જેટલી શાળા અને કોલેજોમાં પરીક્ષા લેવામાં આવી હતી. સવારે 9:30 વાગ્યાથી બપોરે 12:30 વાગ્યા સુધી યોજાયેલી 200 ગુણની MCQ આધારિત પરીક્ષા બાદ ઉમેદવારો અને નિષ્ણાતોએ પેપર અંગે પોતાની પ્રતિક્રિયાઓ આપી હતી.
પેપર મધ્યમ રહ્યું, સમજણપૂર્વક અભ્યાસ કરનારાને ફાયદો
સ્પર્ધાત્મક પરીક્ષાના નિષ્ણાતોનું માનવું છે કે પેપર ખૂબ અઘરું પણ નહોતું અને ખૂબ સરળ પણ નહોતું. જેમણે માત્ર ગોખણપટ્ટી નહીં પરંતુ વિષયને સમજણપૂર્વક અભ્યાસ કર્યો હતો, તેમના માટે પેપર અનુકૂળ રહ્યું હશે. શૈક્ષણિક નિષ્ણાત મહેશભાઈએ જણાવ્યું કે પ્રશ્નપત્રમાં ‘બીટવીન ધ લાઇન્સ’ સમજણ ચકાસતા પ્રશ્નો વધુ હતા. પેપર મધ્યમ કક્ષાનું હોવાથી મેરિટ પણ ઊંચું જવાની શક્યતા છે.
જનરલ મેરિટ 125થી 130 સુધી પહોંચે તેવી શક્યતા
નિષ્ણાતોના મતે ગયા વર્ષની સરખામણીએ આ વખતનું પેપર સરળ હતું. ગયા વર્ષે પેપર મુશ્કેલ હોવા છતાં મેરિટ ઊંચું રહ્યું હતું. આથી આ વર્ષે જનરલ કેટેગરીમાં મેરિટ 125થી 130 માર્ક્સ સુધી જઈ શકે તેવી શક્યતા વ્યક્ત કરવામાં આવી રહી છે. બીજી તરફ કેટલાક નિષ્ણાતોનું માનવું છે કે પેપર લાંબું અને ટ્રીકી હોવાથી મેરિટ 110થી 120 વચ્ચે પણ અટકી શકે છે.
પાર્ટ-Aમાં સમય વધુ માંગતા પ્રશ્નો
પરીક્ષાનું માળખું બે ભાગમાં વહેંચાયેલું હતું. પાર્ટ-Aમાં ગણિત, રીઝનિંગ અને ગુજરાતી કોમ્પ્રિહેન્શનનો સમાવેશ કરવામાં આવ્યો હતો. નિષ્ણાત દિનેશ કણેતના જણાવ્યા મુજબ પાર્ટ-A ઉમેદવારો માટે સૌથી વધુ પડકારરૂપ રહ્યો હતો. તેમાં પૂછાયેલી પઝલ્સ અને રીઝનિંગ આધારિત પ્રશ્નો લાંબા અને સમય માંગી લેતા હતા. જે ઉમેદવારોને શોર્ટકટ ટ્રિક્સ અને ઝડપી ગણતરી આવડતી હતી તેઓને આ વિભાગમાં ફાયદો થયો હશે.
પાર્ટ-Bમાં બંધારણ અને આધુનિક ઇતિહાસ પર ભાર
પાર્ટ-Bમાં ઇતિહાસ, ભૂગોળ, બંધારણ, વિજ્ઞાન, વારસો અને કરંટ અફેર્સ જેવા વિષયો આવરી લેવામાં આવ્યા હતા. ખાસ કરીને ભારતીય બંધારણમાંથી સીધી કલમો પૂછવાના બદલે વૈચારિક સમજ ચકાસતા પ્રશ્નો પૂછાયા હતા. ઇતિહાસમાં આધુનિક ભારતના ઇતિહાસને વિશેષ મહત્વ આપવામાં આવ્યું હતું. સામાન્ય વિજ્ઞાનના પ્રશ્નો ધોરણ 6થી 10ની GCERT અને NCERT પુસ્તકો આધારિત હોવાનું જોવા મળ્યું હતું.
કરંટ અફેર્સનું પ્રમાણ અપેક્ષા કરતાં ઓછું રહ્યું
ઘણા ઉમેદવારોને આશા હતી કે કરંટ અફેર્સમાંથી વધુ પ્રશ્નો પૂછાશે. જોકે અગાઉની પરીક્ષાઓની તુલનામાં આ વખતે વર્તમાન પ્રવાહોનું પ્રમાણ ઓછું રહ્યું હોવાનું નિષ્ણાતોએ નોંધ્યું છે. આ કારણે કરંટ અફેર્સ પર વધુ નિર્ભર રહેલા કેટલાક ઉમેદવારોને આશ્ચર્ય થયું હોવાનું પણ સામે આવ્યું છે.
પ્રથમ વખત AI આધારિત સુરક્ષા વ્યવસ્થા
ભરતી પ્રક્રિયામાં પારદર્શિતા જળવાઈ રહે તે માટે ગુજરાત પોલીસ ભરતી બોર્ડે આ વખતે પ્રથમ વખત આર્ટિફિશિયલ ઇન્ટેલિજન્સ આધારિત ફેસિયલ રેકોગ્નિશન અને બાયોમેટ્રિક વેરિફિકેશન સિસ્ટમનો ઉપયોગ કર્યો હતો. ડમી ઉમેદવારો અને ગેરરીતિઓને રોકવા માટે પરીક્ષા કેન્દ્રો પર કડક પોલીસ બંદોબસ્ત સાથે અદ્યતન ડિજિટલ સુરક્ષા વ્યવસ્થા ગોઠવવામાં આવી હતી.
હવે પરિણામ અને મેરિટ પર ઉમેદવારોની નજર
પરીક્ષા પૂર્ણ થયા બાદ હવે લાખો ઉમેદવારોની નજર પરિણામ અને સંભવિત મેરિટ પર ટકેલી છે. પેપર મધ્યમ સ્તરનું હોવાથી સ્પર્ધા વધુ કઠિન બનવાની શક્યતા વ્યક્ત કરવામાં આવી રહી છે.
